Të dashur studentë,
Në nisje të vitit akademik 2025–2026, ju uroj mirëseardhjen në Universitetin Albanian.
Me më shumë se dy dekada përvojë, Universiteti Albanian është konsoliduar si një institucion udhëheqës në arsimin e lartë. Kjo vërtetohet jo vetëm nga komuniteti ynë prej mbi 20,000 të diplomuarish, por edhe nga gjerësia dhe cilësia e programeve tona akademike – më shumë se 40 gjithsej – të dizajnuara për t’u përshtatur me kërkesat e një tregu pune në zhvillim të vazhdueshëm dhe të teknologjizuar.
Kurrikulat tona janë rishikuar në mënyrë të vazhdueshme për të harmonizuar njohuritë teorike me aplikimin praktik. Arsimi ynë synon t’ju pajisë me mjetet e duhura për t’u përballur me sfidat e botës profesionale. Ju – studentët – jeni në qendër të punës sonë; ky është angazhimi ynë thelbësor si universitet privat dhe si universiteti juaj.
Përtej mësimdhënies, stafi ynë akademik është aktivisht i angazhuar në kërkime shkencore, bashkëpunime ndërkombëtare dhe publikime në revista të respektuara – përpjekje që janë thelbësore për vitalitetin dhe zhvillimin e institucionit tonë.
Është me rëndësi kyçe për komunitetin tonë akademik që ajo që ofrojmë të jetë më shumë se arsim – të jetë një eksperiencë formuese. Ne jemi të përkushtuar të zhvillojmë aftësitë tuaja profesionale, si dhe formimin tuaj si qytetarë të përgjegjshëm dhe të angazhuar. Sot, vlera të rëndësishme si demokracia, kushtetutalizmi liberal dhe sundimi i ligjit janë të kërcënuara në mbarë botën. Ju inkurajoj fuqimisht që të njiheni me këto tre koncepte. Vetëm atëherë do të kuptoni plotësisht pasojat e valës së iliberalizmit anti-demokratik dhe autoritarizmit të cilën po e dëshmojmë – madje edhe në vende që dikur qëndronin si shtylla të sigurta të qeverisjes demokratike dhe traditave kushtetuese liberale.
Arsimi i lartë duhet, pra, t’ju përgatisë jo vetëm për një karrierë, por edhe për të kontribuar në mënyrë kuptimplotë në shoqërinë tuaj, për të mbrojtur vlerat etike dhe politike, dhe për të vepruar me integritet si në jetën private ashtu edhe në atë publike. Vetëm ju – gjenerata që vjen pas meje – mund ta ndryshoni Shqipërinë drejt një të ardhmeje më të mirë.
Si rektor, jam krenar dhe i interesuar për transformimin tuaj akademik personal. Kjo është kryesore për suksesin tonë institucional. Si filozof, jam i interesuar për vlera si liria, autonomia dhe përgjegjësia politike. Ju ftoj të flisni me mua për këto çështje sa herë që ndjeni nevojën – unë do të gjej gjithmonë kohë për ju.
Ne jemi të sigurt në misionin tonë dhe plotësisht të përkushtuar t’ju mbështesim gjatë gjithë rrugëtimit tuaj.
Miresevini në Universitetin Albanian. Ju uroj një vit akademik produktiv, frymëzues dhe të suksesshëm!
